گبل لا صير معتاد(مدمن)
تحترمني الناس چانت وين ماروح
كلهه اتگوملي وگعد مكاني
چنت فوگ الزلم اتعله ليفوگ
أوچنت هيبه واگولن آني وآني
كاشخ كل وكت وعگالي يشهد
ابد ما يوم اذكر فارگاني
مثل ورده ومزهره الكل يحبني
چنت محبوب عدناسي وزماني
چنت نور أبظلام الليل داوي
أومن اعبر يصيحولي الفلاني
ابوالغيره يگلولي ابوفلان
وذب روحي بجهنم للناخني
چنت مثل الأسدهايج وخوّف
أوكلهه اتخاف مني ومن لساني
بس يا حيف مادامت هالأيام
أوما ادري اشجره وشنهوالفاني؟
رمتني فشگه سوده أبوسطه الأفكار
أوشيطان الملاهي غشمراني
ناوشني الجگاره وگتله ممنون
أوكثيرالعاب جاب ولاعباني
مراحل بالحشيش وشفت دورات
وبـدخان تــرياگه ال عماني
عميت وماشفت جدامي شيشه
بس دود ألأكل مني وكلاني
صرت معتاد رسمي أبليه غيره
أوحرجت الشرف بصغر أواني
فنيت البيت كله اتفلش وطاح
أوعدميت الفرح بَسرع ثواني
صرت خشبه أبوسط نيران مرمي
آنه أللي ردت،محد رماني
صرت مكروه جيفه ولابس اهدوم
واعز الناس عافاني ونساني
ادورالموت دربونه وشوارع
أوحته الموت جاني و ما خذاني
فاضل الاحوازي…نموت ويحيى الوطن
